A introdución dentro do xenoma humano dun único xene, chamado XIST, podería corrixir a síndrome de Down (trisomía do cromosoma 21), segundo informa a revista científica británica Nature.
A investigación foi levada a cabo por un equipo de científicos da Universidade de Massachusetts (Estados Unidos) e supón un gran avance no desenvolvemento de terapias baseadas en cromosomas.
Os científicos introduciron unha gran cantidade do xene XIST procedente do cromosoma X dos mamíferos placentarios, dentro de células nai cultivadas in vitro dunha persoa con síndrome de Down.
Segundo os resultados, esta manipulación do xenoma humano foi capaz de silenciar a terceira copia adicional do cromosoma 21 que causa a síndrome de Down.
Para iso, compararon as células antes e despois de que o xene XIST cubrise e silenciase o cromosoma extra, e descubriron que, ao facelo, o xene axudaba a corrixir os patróns inusuais de crecemento das células nunha persoa con síndrome de Down.
Tras comprobar os resultados por oito enfoques distintos, o equipo concluíu que a investigación facilita novas claves para estudar tanto os cambios celulares nestas patoloxías como a desactivación dun cromosoma corrente.
Aínda que queda un longo camiño para unha aplicación clínica, segundo os científicos, esta investigación demostra que corrixir as desordes xenéticas en células vivas pode ser alcanzable.
A continuación preme no seguinte vídeo para ver un resumo de en que consiste a síndrome de Down:
Lucía González Dapía
No hay comentarios:
Publicar un comentario